هل خريج حاسبات ومعلومات مهندس ؟

علمي ولا ادبي

الموضوع ده مهم جدا لطلاب الثانويه , وهيساعدهم جدا ان شاء الله انهم يحددوعلمي ولا ادبي وايه الافضل والمناسب ليهم وخصوصا بعد التغيرات اللي حصلت.

سواء كان استخدام التابلت او التغير في شكل الاسئله وشكل الامتحانات والطريقه اللي بتمتحنو بيها...

سم الله كده وابدا💓

الموضوع ده بيتكلم علي اهم اربع حاجات من خلالهم تقدر تحدد المناسب ليك..

1) تدخل اهلك واصحابك في قرارك (ادخل علمي ولا ادبي).

2) ادبي (بتحتاج حفظ) اسهل من علمي (بتحتاج فهم).

3) الميول الذهني.

4) الميول المهني.

 

1) تدخل اهلك واصحابك في قرارك (ادخل علمي ولا ادبي).

اول حاجه لازم تبقي عارفها ان ده مستقبلك انت وانت اللي هتعيشو سواء حلو او وحش.فمتختارش هتخش علمي مثلا علشان والديك عايزين يشوفوك مهندس , او دكتور, او قالولوك خش ادبي علشان هي الاسهل ليك وان احنا مش اد علمي مثلا.

وغالبا اهلنا بيبقو مش متعلمين او متعلمين بس بمؤهلات قليله.وحتي لو مؤهلات عاليه فالنظام اتغير تماما فبالتالي هما بيبقو عايزين يفيدوك وعايزين في افضل مكانه , ولاكن العاطفه دي ممكن تخليهم يدلوك علي طريق غلط بدون قصد

او تختار بناء علي ان اصحابك كلهم دخلو علمي فانت مش اقل منهم , وخليك عارف ان كل واحد ليه قدرات , وميول خاصه بيه للحاجات اللي بيحبها. فاللي يناسبو هو ميناسبكش انت والعكس  صحيح👌.

2) ادبي (بتحتاج حفظ) اسهل من علمي (بتحتاج فهم)

المقوله دي طبعا غلط وخصوصا في النظام الجديد.لانو المتحان مبيجبش الاسئله صريحه 

فعلشان تحلها لازم تكون ملم بالموضوع كويس وفاهم كل حاجه عن الموضوع .وتالته ثانوي عموما سواء علمي او ادبي بتحتاج حفظ وفهم وتعب ومجهود كبير. فانت في الاخر سواء دخلت علمي ولا ادبي كل المواد محتاجه فهم وحفظ .

والقسمين محتاجين مذاكره .فده مياثرش علي قرارك نهائي .

 

3) الميول الذهني (علمي ولا ادبي)

وده انت بتقدر تحددو بناء علي المواد الموجوده عندك. يعني لو انت بتحب الكيمياء , الفزياء , الاحياء , الميكانيكا , فدي مواد علمي وانت كده تخش علمي.

ولو انت بتحب تاريخ , جغرافيا , فلسفه ومنطق , علم نفس واجتماع , فدي مواد ادبي وكده انت تخش ادبي.

 ومش لازم تكون بتحب مواد ادبي كلها علشان تخش ادبي ,  ولا بتحب مواد علمي كلها علشان تخش علمي.

لو انت بتحب تلات مواد في القسم من اصل اربعه خشو برضو هتتأقلم علي الماده التانيه مع المذاكره عادي جدا.

ولو انت مش عارف بتحب ايه وايه المفضل عندك ؟؟

فاستعين بدرجاتك في اولي ثانوي هل انت جايب في المواد الادبيه درجات اكتر , ولا المواد العلميه هي اللي درجاتها اكتر.

 وده معناه اكيد ان انت

لو جايب مجموع عالي في مواد علمي يبقي انت بتحب مواد علمي , وتقدر تذاكر فيها وقت اكتر, وهكذا مع مواد ادبي .

 

4) الميول المهني ( علمي ولا ادبي )

 

فهو لو انت عايز تخش الكليات الادبيه زي سياسه واقتصاد , حقوق , السن , تجاره , تربيه , اداب , اعلام ......

ف تخش ادبي لان هو ده اللي هيوصلك للكليات دي بسهوله.

 

ولاكن لو عايز تخش الكليات دي هندسه , طب , صيدله , علاج طبيعي , حاسبات ومعلومات , علوم .....

يبقي اكيد تخش علمي.

وطبعا علمي متاحله كل الكليات الادبيه والعلميه. 

ولاكن انت لو بتحب الكليات الادبيه فتختصر الطريق , وتخش ادبي علطول , لان علمي ممكن نقول انو محتاج مجهود اكتر شوي عن ادبي . وطبعا ده هو اللي بيخليه متاحله كل الكليات وكمان تنسيقو احسن , نتيجه للمجهود اللي بيبذلو طالب علمي اكتر شوي من مجهود طالب ادبي.

لو عايز تعرف اكتر علمي ولا ادبي خش هنا

 

اتمني اكون وصلتك للقرار الصح

وفي النهايه القرار بايدك انت ولاكن انا مجرد بشاركك خبرتي بس وبحاول اسهل الامور عليك اكتر.

لو عايز تعرف اكتر عن النظام الجديد

 وكده وصلنا لنهايه المقاله لو فيه سؤال او اي استفسار متتردتش تسيبو في تعليق